طير السمان...بقلم الشاعر عز الدين ناس الرمى
فدفد و خرج طوير السمان
ڭال نمشي ندور و نتسارى
ما حد الجنيحات باقين خفاف
ما حد الجو زاهي مزيان
نضيع وقتي عيب و خسارة
ما عنديش آنا مناش نخاف
هز عنڭو لفوڭ سرح الجنحان
طار علا بغى يعاند الطيارة
طاح لمسكين و تهرسو لو لكتاف
داخ. تلف و تقلب ليه لميزان
غرو شبابو و النفس لغدارة
في رمشت عين طار بيه الساف
كلامي هذا نهديه لكل إنسان
كا يسمع لكلام الناس لهضارة
و تبع لمعقول يا خويا لا تخاف
لا تمشي في طريق الهم و لحزان
ديها في راسك لا تضيع عمرك خسارة
قبل ما تكبر و يتبدلو لوصاف
خمم و فكر في كلامي مزيان
لا تديهاش في لعباد لحڭارة
دير حساب راسك لا تكونشي خواف
حضي صوارك يا صاحبي ساوي لوزان
خدم في صغرك يا سيدي و ضرب تامارة
المال يعطي قيمة لبنادم و بيه يزيانو لوصاف
بقلمي : عزالدين ناس الرمى
خريبڭة.... المغرب
Le 16/01/2020
تعليقات
إرسال تعليق